wetenskaplik
uit hout gesny –
as ek jou gooi
kom jy terug na my;
ek werp jou op die water
met hoop en geloof
en soos plegtig in jou bou beloof
is jy terug in my hand:
met kleur en belofte gevul
die sirkel voltooi –
jy’t my nie gekul.
- Franci JvV, in Darwin, Australië: 1997 -
Ek kom weer terug
op herinnering se rug –
vir ‘n voëlvlug
deur my vreemd-bekende boorlingland
om te kyk, te deel, te neem, te pluk
van al die na-aan-my-wese-mense en –dinge
wat aan my hart se wande ruk.
My sakke sal ek hiervan boordensvol laai.
Ek het gekom, gegaan, geoes, gesaai.
- Franci JvV, vir my wêreldburgervriendin geskryf, laat 90’s -
In ‘n land van sand
ver, ver van hier
werskaf en sing ‘n mannetjie van plesier:
Ek is die sandstrooiertjie
kinders se sorge-weggooiertjie;
hul na-droomland-uitnooiertjie!
Vanaand gaan die sandstrooiertjie
jou in daardie spesiale
tussen-dag-en-nag oorgangsuur
met ‘n geskenkpak própvol mooiste, mooiste verhale
na droomland stuur…
In ‘n land van sand
ver, ver van hier
skud en sif die mannetjie
handevol sand
heen en weer
heen en weer
deur ‘n towerkannetjie
tot fyn, blinksuiwer goudstof
en begin om hom op te tof,
want vanaand reis hy met die hemelpad
verby die maan
wat tussen skitterblink sterre staan -
tot by jou kamervenster, my kind
waaraan hy liggies tik-tik soos wind
sodat jy hom
om soete slaapstof
op jou kussing te strooi.
Terwyl hy ook sterretjies aan jou kamerplafon hang
vir die wegstuur van donker se bang
streel hy saggies oor jou wang
en betower jou met sy sang:
Ek is die sandstrooiertjie
jou sorge-weggooiertjie;
jou na-droomland-uitnooiertjie!
Jou ogies is nou saligswaar…
Jy’s amper, ámper daar,
fluister jou sorge-weggooiertjie
en strooi ‘n laaste korreltjie sand
uit sy hand;
stoot jou saggies oor wakkerwees se rand
tot ver, vér in droomland
doer ánderkant die land van sand.
- Franci JvV, Junie 2006 -
staan punt-in-die-wind;
ek dra ons ongebore,
wonderbaarlik mens-wordende kind
met naelstring aan die vlees
van ons liefde gebind.
- Franci JvV, in afwagting in 2000 geskryf -
Met jou stap ek in my hart
op soveel paaie
waarheen die lewe my vat:
soms is jy daar om my hand te hou
soms is jy ‘n gedagte wat alles omvou
soms verlang ek vaag na jou
soms fel en intensief
maar – áltyd, áltyd, my lief
is ek van jou bewus
weet ek dat alles nog dieselfde
en tog so anders is…
- Franci JvV, iewers, êrens vir my lief geskryf -
Soos ‘n kers se ligkrans
verbreek jy ‘n nagkamer
se donker skans.
Versigtig begin jy flikker -
tot ‘n sagte, warme glans
wat al hoe sterker,
later seker en juigend
deur die skadu’s dring,
jubelend in elke hoek sing
en triomfantelik teen die dak
bokant alles dans.
- Franci JvV, Nuwejaar 2004 -
neem my hart
kleur dit met jou warmbruin,
geel, goud en koper mengelmoes;
steek dit aan die brand
met die vuur van jou wese.
Laat dit gloei, knetter en smeul;
maak dit warm, sterk,
betowerend mooi –
ontvanklik vir, maar weerbaar teen
die vaal en winternaaktheid wat kom…
- Franci JvV -
